Naga-te'n duhthlan tur China kan nei : NSCN-IM

Naga hel pawl - National Socialist Council of Nagaland - Isak-Muivah (NSCN-IM)-te chuan, sorkar laipuiin an ngaihthah a, inremna a siampui lawk lo a nih chuan China an awn dawn niin a sawi a, India ni lo duhthlan tur dang an neih thu an sawi.

‘The Week’ magazine-in tunhnaia Naga Army chief Phun­ting Shimrang a kawmnaah he thu hi Shimrang chuan a sawi a, sorkar laipui chuan Naga-te a zah lo hle a ni, a ti. "Naga-te'n China kan pan hunah India chu a harhchhuak chauh ang" tiin a sawi. Sorkar laipuiin Naga-te a tham lo hle nia sawiin, "Inremna siam turin vawi eng awm zat inbiakna neih a ni tawh a, heti chung hian inremna siam a la ni lo. Inremna tluantling siam tur hian sorkar laipui chuan hma a la chak tawk lo a, hun rei tak chhung tihkhawtlai tawh a ni. Hei hi Naga mipuite zah lohna leh diriamna a ni", a ti.

NSCN-IM-a an home minister R H Raising pawhin August 3, 2015 khan sorkar laipui aiawh leh, NSCN-IM general secretary Thuingaleng Muivah-te chuan framework agreement an ziak tawh tih sawiin, hei hi tun thlenga bawhzui a la ni lo a, inremna tluantling ziah a la ni lo, a ti. Sorkar laipuiin inremna tluantling ziak tura hma a la muang lutuk chu an hrethiam lo takzet tih sawiin, India sorkarah beisei tur nei lo nia an inhriat chuan China an awn mai tur thu a sawi ve bawk.

‘The Week’ magazine hian kar kalta Ningani khan NSCN-IM hruitute hi, Nagaland-a an headquarters, Hebron-ah kalin interview hi an neihpui a ni.