Arunachal sorkarin 'Organic Mission' a tlangzarh

Arunachal Pradesh sorkar chuan agriculture lama hmasawnna tura project a duan 'Organic Mission' chu a kalpui ṭan ta.

Union Minister of State for Micro, Small and Medium Enterprises Giriraj Singh chuan kar kalta Inrinni khan he mission hi a tlangzarh a ni. Minister Giriraj Singh chuan he mission hmang hian Arunachal state chuan agriculture lamah nasa taka hma a sawn a beisei thu sawiin, chemical fertilizer hman lohna state ni thei tura hma la turin a chah. An ram leilung chu thlai chinna atana duh thu sam a nih thu sawiin, state mipuiten ṭangkai zawka an chhawr a beisei thu a sawi. State dangte entawn thak khawpa hna thawk tura chahin, organic state an nih ngei theih a beisei thu a sawi bawk.

State Agriculture Minister Wangki Lowang pawhin thu sawiin, sorkar chuan agriculture lama hmasawnna a ngaipawimawh a, a tharchhuah hralhna tur thlengin hma a la dawn a ni, a ti. Thlai thar hralh chhuahna turin kawngpui ṭha ngaihtuah zel a ni a, hmun zau zawka thawn chhuak thei turin Naharlagun - Delhi inkarah rel tlan chu hman ṭangkai a ngaih thu a sawi. Industries Minister Tamiyo Taga pawhin agriculture tihhmasawn zel nan sorkar laipuiah scheme thar kalpui turin rawtna thlen a nih thu a sawi ve bawk.

Organic mission tlang­zarhna hun hi Union Agri­culture Secretary S K Pattanayak pawhin a hmanpui a, sorkar laipui chuan Dirang-ah centre of excellence a din dawn tih sawiin, hmarchhak state-te'n kawng hrang hranga hma an sawnna tur project eng emaw zat duan a nih thu a sawi a ni.