Assam-a chhiatna thlengah mi 108 thi tawh

Assam-a ruahsur nasa avanga tuilian leh leimin vanga thi chu nimin thleng khan mi 108 an tling tawh.

Nimin thleng khan Brahmaputra leh Barak-a lui hrang hrangte an la lian a; Cachar, Hailakandi leh Karimganj-te chuan tuilian an la tuar nasa hle.

Assam State Disaster Management Authority (ASDMA) chuan tuilian tuar mek district hrang hrangah chhanchhuah hna thawktute tirh belh an nih thu a sawi. Itanagar leh Bhubaneswar aṭangin NDRF team pariat, mi 207 awmna chu koh luh belh an ni a, Dimapur aṭangin Silchar-a tuilian tuarte ṭanpui hna thawk turin member 120 awmna Army team chu lawng pakua nen an thleng tawh bawk. Anni bakah hian Cachar district-ah hian CRPF leh State Disaster Response Force (SDRF) team pakhat ve ve tirh luh belh an ni.

Silchar khawpui hmun tam zawk chu tuiin a la chim a, khawpuia cheng mi nuai thum dawn chuan ei tur, tui thianghlim in tur leh damdawi lam indaih lohna te an tawk ṭan niin official-te chuan an sawi. Air Force helicopter hmangin food packet, tui bottle leh mamawh dangte thlak a ni tawh bawk.

Assam-a tuilian hian revenue circle 103 leh khaw 4,536-ah harsatna thlenin, district hrang hranga relief camp 759 siamah mi nuai 2.8 vel an khawsa mek a ni. Tuilian hian kawngpui 173 leh lei 20 a tichhe tawh a, thlai chinna ram zau tak a chim chhe tawh bawk a ni.

Hmun hrang hranga tuilian an tawrh mek avangin state education department pawhin elementary, secondary, senior secondary leh higher secondary school-te tana summer vacation neih hun a sawn hma phah bawk. Summer vacation hun atana July 1-31 lo ruahman tawh chu sawn hmain, June 25-July25 chhungin neih a ni zawk dawn tih education minister Ranoj Pegu chuan a sawi.