Assam-ah district pangain tuilian tuar

Ruahsur nasa vangin Assam-ah tui a lian leh a, district  panga - Dhemaji, Dibrugarh, Majuli, Jorhat leh Sivasgar district-te chu a tuar nasa zual an ni. 

Assam-ah hian ruahsur nasain tuilian leh leimin a thlen avangin thla khat chhungin mi 32 in nunna an chan tawh. 

Assam state disaster management authority official chuan tuilian vang hian district pangaa cheng zinga mi 36,807 chu hmun him lamah an insaseng a, mi 1,071 chu sorkarin relief camp a siamah an khawsa mek tih a sawi. Tuilian hian thingtlang khaw 102  leh thlai chinna ram hectare 5,031 a zau a chim tawh bawk. 

Brahmaputra leh a peng hrang hrangte chuan hlauhawm chhinchhiahna an pel niin ASDM chuan a sawi a, Dhemaji district-a kawngpui leh infrastructure eng emaw zat a chhe bawk a ni.