Manipur Highway-ah Helten oil tanker leh truck lambun

Manipur-a Kangpokpi district-ah Thawhlehni zing khan oil tanker leh truck eng emaw zat lambun an ni a, pawikhawihtute hi Kuki hel pawl an nih an rin thu police-te chuan an sawi.

National Highway No. 37-a inlambunna hi Thawhlehni zing dar 5.45 vel khan a thleng a, helai hmunah hian inkahna a thleng zui a ni.

Truck leh oil tanker-te hian Central Reserve Police Force (CRPF)-te venhimna hnuaiah Assam aṭangin Manipur khawpui Imphal an pan a, kawng lakah helte hian an lo lambun ta tho a ni. Helho hian silai hmangin lirtheite hi an lo bei a, thi an awm hriat a ni lo a, hliam tuar erawh an awm tih tarlan a ni. Helte hian petrol leh diesel phur tanker pahnih an kap fuh a, chhiatna lian tham erawh a thleng lo. He thil thlenna hmun hi police-te chuan an pan nghal a, a hmun an thlen hmain helte hi an lo inthiarfihlim hman a ni.

Truck driver Laishram Chinglien chuan, inlambunna thleng chu pawi a tih thu sawiin, nunna chan an awm lo chu vannnei hlea an inhriat thu a sawi. Hetih lai hian hliam tuarte chu dam leh thuai tura a duhsak thu sawiin, inlambunna thlen tawh lohna turin CRPF tam zawk dah an phut thu a sawi. CRPF-te tan lirthei 600 chuang venhim chu thil harsa tak a nih avangin, Indian Reserve Battalion (IRB) leh police commando tam zawk dah belh an phut thu a sawi bawk.

All Naga Students’ Association Manipur (ANSAM)-te chuan inlambunna thleng chu an dem takzet tih an sawi a, state sorkar chu mipuite mamawh phurtu lirthei leh a khalhtute himna ngaipawimawh turin an ngen tih an sawi. National Higway (NH)-a inlambunna thleng fo ṭhin chu pawi an tih thu sawiin, venhimna khauh zawka kalpui an duh thu an sawi. ANSAM bakah Naga pawl hrang hrangte chuan he thil thleng an dem thu an sawi.

United Naga Council (UNC)-te chuan district thar din duh lohna lantira thla li zet nawrh an huaihawt chhung khan NH-ah hian inlambunna ṭum eng emaw zat a thleng a, nunna chan pawh mi eng emaw zat an awm a ni. Chief Minister atana N. Biren Singh lakluh a nih hnuah UNC-te hian kawngpui dan an tawpsan a, hemi hnu hian boruak pawh a muanawm chho ṭan viau a ni. Thawhlehni zinga inlambunna thleng hi UNC-te'n nawrh an tawpsan hnua NH-a inlambunna a thlen lehna hmasa ber a ni.

He thil thleng chungchang ngaihtuah hian Chief Minister N. Biren Singh leh a minister-te chuan cabinet meeting an nei nghal a, NH-a venhimna khauh zawka kalpui dan tur an rel a ni. Official-te chuan venhimna khauh zawka kalpui a nih theih nan NH-ah hian IRB leh police tam zawk dahbelh a ni dawn niin an tarlang.