IIT Bombay-in kumin chhung atan Class room-a lecture pek a titawp

Indian Institute of Technology (IIT) Bombay chuan Nilaini zan khan kumin chhungin dan pangngai anga class room-a lecture pek a nih dawn loh thu a tarlang.

He hmalakna hi ram chhunga Covid-19 hri leng vang a ni a, zirlaite an lo him zawk nan dan pangngai anga zirtirtuten class room-a lecture an pek chu titawp lailawk a ni ta a ni. He thutlukna siam tur hian hun rei tak an sawiho thu IIT Bombay director professor Subhasis Chaudhuri chuan a tarlang.

IIT Bombay chuan an zirlaite chu an dah pawimawh hmasak ber thu a tarlang a, "Hri laka inveng chung hian kan semester thar tur hi engtin nge kan kalpui theih ang tiin kan ngaihtuah a, semester dawtah chuan online-a kalpui chu kan rel thlu ta a ni, tiin Chaudhuri chuan a sawi bawk. 

Undergraduate leh post-graduate course hrang hrang chu July thla aṭanga kalpui tur a ni a, zirlai tam zawk hi chhungkaw harsa tak tak aṭanga kal an nih avangin online-a class kalpui tur a nih tawh dawn avang hian an tan IT hardware (laptop leh broadband connectivity) ngaihtuah sak tum a ni. 

Heng zirlaite ṭanpui nan hian cheng vaibelchhe 5 vel chu mamawh a nih thu IIT Bombay chuan a tarlang a, hemi atana ṭanpuina thawh theih a nih thu Chaudhuri chuan a sawi a ni.