Assam tuilian : Silchar khawpui hmun tam zawk tuiin la chim

Assam-a tuilian chuan ziaawm lam pan ṭan mah se, district 27-te chuan tuilian vangin harsatna an la tawk chhunzawm a, nimin thleng khan Silchar khawpui hmun tam zawk chu tuiin a la chim a ni.

Inrinni khan tuilian leh leimin vangin mi pali an thih belh leh a, tun hnaia ruahsur nasa avanga chhiatna thlenga thi hi mi 121 an tling tawh. Thi zinga mi 21 chu Cachar district-a mi an ni.

Chief minister Himanta Biswa Sarma chuan nimin khan Silchar a tlawh leh a, lawngin tuilianin harsatna a thlen dante a enkual a ni. June 20 aṭang khan tuilian nasa tak avangin he khawpuia cheng mi nuai hnih chuangten harsatna an tawh tawh a ni. CM chuan Silchar khawpui hmun tam zawk chu tuiin ala chim a, mipuite harsatna an tawk mek a, an harsatnate tihziaawm a nih theihna atan sorkar leh thuneitute chuan theihtawp an chhuah mek tih a twitter-ah a tarlang.

Cachar deputy commissioner, Keerthi Jalli pawhin harsatna thlen zualna hmunahte drone hmangin tui thianghlim in tur leh chhawmdawlna dangte an thlak thu a sawi. Guwahati leh Jorhat aṭangin Silchar-ah hian tui, buhfai leh mamawh dang MT 85.2 chu thlawhtheihna hmangin thawn luh a ni tawh bawk.

Khawpui chhunga tuilian tuarte chhanchhuah leh chhawmdawl hna hi National Disaster Response Force (NDRF), State Disaster Response Force (SDRF), Fire and Emergency, Police Force leh AAPDA MITRA volunteer-ten an thawk mek a ni.

Assam State Disaster Management Authority (ASDMA) in nimina report a tihchhuahah, khaw 2,894-a mi 25,10,989-te chu tuilian hian a la tibuai mek tih a sawi. Sorkarin relief camp 637 a siamah mi 2,33,271 an khawsa mek bawk. Relief camp-a awm lote pawh chhawmdawlna sem an ni, a ti.

IAF-in Assam leh Meghalaya chhawmdawlna tur pe
Indian Air Force (IAF) chuan Inrinni khan Assam leh Meghalaya-a harsatna tawk mekte chhawmdawlna thil chi hrang hrang ton 96 vel thlawhtheihna hmangin an thiar lut.

Nimina thuchhuah an siamah, IAF chuan state pahniha chhamdawl hna, humanitarian assistance and disaster relief (HADR) operation kalpui mekah Inrinni khan ṭum eng emaw zat thlawhtheihna hmangin chhawmdawlna thil hi an phur lut tih a sawi. June 21 aṭang khan IAF hian Assam leh Meghalaya-ah hian tuilian tuarte chhawmdawlna hna hi a thawk a ni.

IAF chuan ni li chhungin state pahnih-a tuilian tuarte chhawmdawlna tur thil hi ton 203 an phur lut tawh a, helicopter leh transport aircraft hmangin tuilian vanga tangkhang mi 253 a chhanchhuak tawh bawk tih a sawi. IAF hian chhawmdawl hna thawhna atan hian C-130, An-32, Mi 17V5, Mi 171V, Mi17 leh ALH aicraft-te a hmang a ni. Ṭum 74 zet thlawhtheihnate hi a tir lut tawh a ni.