Vawiin aṭangin Assam sorkarin VIP lighht chhit khapna hmang ṭan dawn

Sorkar laipuiin VIP light (red beacon) chhit khapna thupek a chhuah chu vawiin aṭang hian Assam sorkar chuan a hmang ṭan dawn.

Chief Minister Sarbananda Sonowal chuan, "VIP light chhit khapna hi vawiin aṭangin hman a ni dawn a, Minister, MLA leh light chhi pha chinte chu hriattirna pek an ni tawh" a ti. Sorkar laipui chuan thupek a tihchhuah hi May 1 aṭanga hman ṭan tura tih ni mah se an state-ah chuan hman nghal a nih tur thu a sawi. Mahse hei hian ambulance, fire service, police leh army-te chu a huam dawn lo a ni, a ti. Assam sorkar hi sorkar laipui thuchhuah a taka hmang hmasa ber tur state a ni.

Arunachal Chief Minister Pema Khandu pawhin sorkar laipui thu chhuak hi an state-ah hman nghal tur a nih thu a sawi. Khandu chuan, Prime Minister Narendra Modi leh Union cabinet thutlukna chu an thlawp thu sawiin, hei hian ram mipuite inkarah inunauna ṭha zawk a hring chhuak dawn a ni, a ti. Prime Minister thuchhuak hi hriatreng a ni tawh dawn a, ram mipuite tan thu lawmawm tak a ni tiin, hei hi mipui nawlpuiin an thlawp a rin thu leh, kawng tam takin awlsamna a thlen dawn niin a sawi bawk.

Arunachal Chief Minister office chuan thuchhuah siamin, VIP light chhi te chu a hma lama an light chhit dah thla turin a hriattir a ni.