Tripura-in Buh thar chhuak tam Award dawng dawn
Union Ministry of Agriculture and Farmers Welfare chuan Tripura chu buh thar chhuak tam lawmman 'Krishi Karman Award 2015-16' dawng turin a thlang.
Tripura hian kum 2009-10 national award hi a lo dawng tawh a, hmarchhak state zinga dawng hmasa ber leh awmchhun a ni. State Agriculture Minister Aghore Debbarma chuan, Union ministry-in Krishi Karman Award dawng tura a thlang chu lawmawm a tih thu sawiin, hei hian agriculture lamah hma an sawn tih a tilang niin a sawi. Ministry aṭangin Agriculture Department chuan award dawng tura thlan an nih thu hi ziakin an dawng tawh tih a sawi. Tripura bakah hian Tamil Nadu leh Himachal Pradesh-te chu award dawng tura thlan an ni bawk.
Tripura hian kum 2016 chhung khan buh tonne 825,000 a thar chhuak a, hectare khat bial aṭanga buh a thar chhuah zat pawh a pung a ni. Kum 1972 khan hectare khat aṭangin buh kg 973 thar chhuak ang a ni a, 2016-ah chuan hectare khat
aṭang vek hian kg 2,946 thar chhuak ang a ni. Award hi New Delhi-ah sem a ni dawn a, trophy, citation leh pawisa fai cheng vaibelchhe nga a keng tel dawn a ni. Meghalaya chuan Krishi Karman Award sem hunah hian cheng vaibelchhe khat a dawng ve dawn bawk.