Class X thleng Assamese ṭawng zir dawn

Assam sorkar chuan an tualchhung ṭawng, Assamese chu school zawng zawng-ah class X thleng zirlaibua-ah telh a ni dawn tih a tarlang.

Education Minister Himanta Biswa Sarma chuan, state chhunga zirna-in zawng zawngah Assamese hi hmang vek tura tih a ni a, hemi tur hian August-a assembly session neih hunah bill put luh a ni ang, a ti. Hemi rual hian zirlai zingah Assamese aia Bodo leh Bengali ṭang zir duh zawk an awm a nih pawhin harsatna a awm loh tur thu a sawi. Barak Valley-a zirlaite chuan an duh chuan Assamese aiah Bengali an thlang thei ang a, Bodo thlang an awm a nih pawhin harsatna tur a awm lo ang, a ti. Minister Sarma chuan, zirna-in zawng zawngah Assamese ṭawng zir a nih theih nan Central Board of Secondary Education (CBSE) leh Kendriya Vidyalaya Sangathan (KVS)-te hman a nih tur thu sawiin, hei hi Kerala leh Karnataka-ahte pawh hman a nih thu a sawi bawk.

Kum 2016-a BJP kaihhruai sorkar a din khan, sorkar thar chuan zirna tihhmasawn chu a ngaih pawimawh tur a nih thu a lo sawi tawh a ni. Hetih lai hian zirtirtu indaih lohna a la nasa hle a, zirtirtu hna ruak hnawhkhah loh 14,331 zet a awm tih education minister chuan a sawi. Hnaruak hnawh khah loh chhan hi B.Ed, D.Ed degree leh diploma nei an tam tawk loh vang a ni, a ti. Hetih lai hian TET paltlang canidate 19, 709 an awm tih sawiin, state sorkar chuan November, 2018-ah mi 3,000 a la dawn niin a sawi. Hemi atan hian hriattirna tih chhuah tawh a nih thu leh, diltu pawh mi 6027 chuang an awm thu a sawi bawk.