Eirukna hriin Manipur a man - N Biren Singh

Manipur Chief Mi­nister N Biren Singh chuan an state chu eirukna hriin a man niin a sawi.

He thu hi All India Radio, Imphal-te'n an buatsaih ‘Yenningthagee Eshei’ (Spring Music Concert) a hmanpuinaah a sawi a ni. Biren chuan hun rei tak ata tawh eiruknain an state a tuam tawh a, hei hi tihtawp a hun tawh takzet ni tiin, mipuite chu eirukna do zel turin thawhpuiah a sawm. Congress kaihhruai sorkar hun laiin eirukna a hluar hle tih sawiin, hei hian hmasawnna a tiṭhuanawp a ni, a ti. Police lak dana thil fel lo tam tak awm te chu hlemhletnain a hrin chhuah a ni thu leh, pawi a tih thu a sawi. BJP kaihhruai sorkar chuan theihtawpin eirukna a dodal dawn tih sawiin, mipui­te thlawpna an ma­mawh thu a sawi bawk.

CM Biren chuan, project ṭha tak duan ni mah se dik taka hna thawh ṭhin a nih loh avangin hmasawnna tluantling a awm thei lo niin a sawi a, sorkar tharah chuan heng hna thawhte hi uluk taka vil an tum thu a sawi. Hnathawh mek te chu sorkar website-ah tarlan ṭhin a ni dawn tih sawiin, hna thawk ṭha lo te chu sum pek chhuah an ni lo ang, a ti. Sorkar chuan thil engkim langtlang takin kalpui a tum a, mipuiten sorkar hmalakna te an hre zung zung thei dawn a ni, a ti. Manipur sorkar hian tun hnai khan website pahnih a tlangzarh a, hei hi sorkar langtlang a nih theih nana an hmalakna a nih thu tarlan a ni.

All India Radio-in programme a buatsaih hi state Commerce and Industry Minister, Th Biswajit pawhin a hmanpui a ni.