Silchar tuilian hi mihring thlentir a ni : CM Sarma

Assam chief minister Himanta Biswa Sarma chuan tuilian tuar mek, Silchar khawpui chu Pathianni khan a tlawh leh. Hei hi darkar 72 chhunga Silchar a tlawh ṭum hnihna a ni.

CM Sarma chuan Silchar-in tuilian a tawrh mek chu mihringte chhiatna thlen tir a ni, tiin misual ṭhenkhatin Bethukandi-a Barak lui lian danna siam an tihchhiat avangin khawpui chhungah tui a len phah niin a sawi. Silchar aṭanga km thum chuanga hlaah, Baraklui tui danna hi mi ṭhenkahtin an tichhia a, hetianga pawikhawihtute hi man chhuah ngei an nih tur thu leh, official inhnamhnawih an awm a nih pawhin chhui chian a nih tur thu CM chuan a sawi.

'Bethukandi thil thleng hi kan inzirna pawimawh tak tur a ni. Tui a lo len leh palh pawhin, lui kamahte police duty tur kan dah zel tawh ang," a ti.

Sarma chuan Cachar District Disaster Management Authority pawhin a hmain khawpuia chengte chu chhiatna thleng thei chungchangah hriattirna pawh an pe tawh a, mahse hetianga tuilian nasa hi an la tawh ngai loh avangin mi tam takin an lo ngai thutak lutuk lo niin a sawi.

Hun eng emaw chen tuiin khawpui chhung hi a chim tawh vangin mipuite hian tui thianghlim in tur an tlachham ṭan tawh a, NGO hrang hrangte chuan tui thianghlim litre nuai khat tal lakluh tumin hma an la mek a ni.