Tripura : Agartala-ah punkhawm khap

Tripura-a assembly constituency palia by-election result chu Pathianni khan puan a ni a, inthlan result puan hnuah Agartala khawpuiah buaina a chhuak zui a, hei vang hian punkhawm khapna thupek tihchhuah nghal a ni.

Assembly bial palia by-election neihah hian rorellai, BJP chuan seat pathumah hnehna an chang a, Congress party in seat khat an la bawk. Chief minister Manik Saha pawh Town Bardowali bialah vote 6,104 in a chak. Congress ticket-a thlan tlin awmchhun hi February thlaa BJP MLA a nihna aṭanga banga Congress party zawmtu, Sudip Roy Barman a ni a, Agartala seat-ah thlan tlin a ni. Jubarjnagar bialah BJP candidate Malina Debnath leh Sumra bialah BJP candidate Swapna Das-te an tling bawk.

Thla hmasaa CM atana ruat, Saha hi Rajya Sabha member a ni a, CM dinhmun chelh chhunzawm tur chuan Assembly member-ah thlan tlin leh phawt a ngai a ni. Thlan tlin a nih tak vangin Rajya Sabha member a nihna aṭanga banna a thehluh a ngai dawn a ni.

Inthlan result puan a nih hnuah Agartala khawpui chhung hmun hrang hrangah buaina a chhuak zui a ni. State Congress hotu Birajit Sinha chuan an party worker eng emaw zat chu BJP worker-ten beiin hliam an tuar niin a sawi a, BJP lam pawhin Congress worker-te nena an inbeihnaah an party mi leh sa 13 in hliam an tuar tih an sawi ve bawk.

Buaina chhuak zel tur venna atan SDM Sadar Ashim Saha chuan khawpui chhungah mipui punkhawm khapna thupek a tichhuak nghal. Punkhawp khap bakah motorcycle-a inphurh te, brick bat lakkhawm te, motorcycle pahnih aia tam tlan rual khapnate pawh siam nghal a ni bawk.