Tawang leh Dirang-ah Advanced Landing Ground din dawn

Sorkar laipui chuan China ramri depa awm, Arunachal Pradesh-a Tawang leh Dirang-ahte Advanced Landing Grounds (ALG) din a nih tur thu Ningani khan a puang.

Defence Secretary G. Mohan Kumar leh Arunachal Pradesh Chief Minister Pema Khandu-te chuan tunhnai khan ram himna chungchang ngaihtuahin high-level review meeting an nei a, Dirang leh Tawang-a ALG din chungchang hi an sawi dun a ni. Meeting hi Town Planning and Urban Development Minister, Nabam Rebia bakah, senior Army official eng emaw zatin an telpui a ni. Defence Secretary Mohan Kumar chuan ALG hi ram venhimna tihchakna tur a nih thu sawiin, China-in ramri chungchangah India a beih fo avanga din a nih tur thu a sawi. Arunachal CM Khandu chuan ramri depa awm Tawang leh Diranga ALG din tur chu a thlawp thu leh, ram venhimna kawnga thil pawimawh tak a nih thu a sawi.

Defence Secretary chuan ALG dinna tur hi Defence Minis­try chuan a pawmpui tawh thu AP Chief Minister a hrilh a, hei bakah hian Arunachal Pradesh hmun hrang hranga ALG-te chu civil terminal atan hman an remti tih a sawi. Arunachal-ah Tuting, Mechuka, Along, Passighat, Vijaynagar leh Ziro-ahte ALG hi din a ni tawh. Tun hnaia India-China border chungchanga ram pahnihte inkara inhriatthiam lohna awm chho leh mek denchhenin ALG hi din belh tum a ni a, Defence Ministry leh Indian Air Force-te chuan kawng hrang hrangin hma an la leh mek a ni.

Sorkar laipui chuan China nena an inchuh Tawang chu kawng hrang hranga tihhma­sawnna leh venhimna tur rua­hmanna hrang hrang a kalpui a, Missamari-Tenga-Tawang railway line siamna turin sum ṭhahnem tak a ruahman a, ALG din a nih tur thu a puang leh bawk. Missamari-Tenga-Tawang railway line siam nan hian cheng vaibelchhe 50,000 - 70,000 ruahman a ni a, kum 2018 aṭanga hna ṭan tura ruahman niin, kum 2020-ah zawh hman beisei a ni. Hemi atan hian survey pawh neih mek a ni a, zawh thuai beisei a ni.

Kumar chuan China-in tun hnaia Arunachal Pradesh-a hmun paruk, China sorkarin an hming a thlak chu pawmzam mai theih a nih loh thu sawiin, ram himna turin leh China laka invenna turin ALG hi din tura tih a nih thu a sawi. China chuan Arunachal hi “southern Tibet” ram bung pakhat-ah a chhal a, a ram chhunga awm niin a sawi. Tun hnai khan Tibetan sakhaw puithiam Dalai Lama chuan Arunachal hi a tlawh a, hei hi China chuan na takin a sawisel a ni. Dalai Lama-a'n Tawang a tlawh vangin ram pahnih inkarah boruak ṭha lo a chhuah theih thu te, ramri chungchanga buaina awm ṭhin chu a punlun theih thu te a sawi.

Ministry of External Affairs thupuangtu Gopal Baglay chuan Arunachal chu India ram chhunga awm a nih thu a sawi a, China sorkarin he state huamchhunga hmun paruk hming a thlak chu dankalh a nih thu a sawi. Hei hi sorkar laipui chuan a pawmzam mai dawn lo tih sawiin, a ṭul dan aṭangin chhat let a ni ang, a ti. Ram leh a chhunga cheng mipuite himna chu sorkar laipuiin a ngaihpawimawh ber a nih thu sawiin, ramri chungchanga China-in India a nek fo avangin ram himna turin hma lak a ni zel dawn tih a sawi bawk.