Rakesh Paul-a bail-in chhuah

Assam Public Service Commission (APSC) chairman hlui Rakesh Paul chu Ningani khan bail-a chhuah a ni.

Assam Special Court chuan CrPC Section 167 tlawhchhanin APSC chairman hlui bail-a chhuah phalna hi a pe a ni. Paul-a chungchang hi assistant commissioner of police (ACP) Sujit Kumar Saikia chuan a chhui a, ni 90 chhunga chargesheet a thehluh hman loh avangin bail-a chhuah lailawk a ni.

PASC chairman hlui hi January 20 khan man a ni a, IPC Section 420, 406 (Prevention of Corruption Act) tlawhchhanin a lakah thubuai ziahluh a ni.

Paul hian APSC hnuaia hnalak­ah thamna sum chang nuai thum a la nia sawi a ni a, chhui chian a nih hnuah man a ni a, hun rei tak chhung police custody-ah dan a ni. A rual hian APSC member dang eng emaw zat man an ni a, thamna sum laknaa inhnamhnawiha puh man an awm nual bawk.

Assam-a eptu party leh pawl hrang hrangte chuan Commission (APSC)-in dik lo taka hna lak exam a kalpui dan thubuai chhui tura inquiry commission din tura sorkar an nawr hnuah din a ni. Commission hi Commission of Inquiry Act tlawhchhana din a ni. Pawl hrang hrangte chuan APSC hna lak chungchang hi CBI chhuitir an phut thu an lo sawi tawh bawk. APSC hna lak thubuaiah hian mi 300 vel zet an inhnamhnawih nia tarlan a ni a, an zingah hian minister hlui leh MLA bakah sorkar mi pawimawh eng emaw zat hming lam rik a ni. APSC member Samedur Rahman chu man a lo ni tawh bawk a ni.

Assam sorkar chuan thamna sum laa puh Assam Public Service Commission (APSC) chairman Rakesh Paul hi a suspend tawh a, President Mukherjee hnenah APSC chairman ban tur hian ngenna a lo thlen tawh bawk. APSC member eng emaw zat chu Assam civil service examination hnuaia hna lak chungchangah thamna sum laa puh an ni a, he thilah hian politician challang tak tak te pawh an inrawlh nia tarlan a ni. Mawhphurtu bera ngaih APSC chairman Paul-a hian a nupui, a unaupa, a driver leh a laina hnai hmingin ram eng emaw zat a nei nia sawi a ni bawk. Gauhati High Court chuan kum 2015 khan Central Bureau of Investigation (CBI) chu Paul-a thil neih chhui chiang turin thupek a lo chhuah tawh a, CBI-te chu preliminary enquiry neih a nih chhung chu Paul-a man lo turin thu a pe bawk.