Hmarchhak state-te'n Flagship Scheme an kalpui ṭha
Hmarchhak state - Assam, Tripura leh Mizoram-te chuan sorkar laipuiin flagship scheme a duan te an kalpui ṭha a, a bikin agriculture leh power sector lamahte an hlawhtling thawhkhat hle. Kar kalta Zirtawpni khan sorkar laipui chuan scheme hrang hrang kalpui ṭhate award hlanna hi New Delhi-ah a buatsaih a, trophy, citation leh pawisa fai cheng nuai 10 a kengtel a ni.
Tripura sorkar chuan Agriculture lamah hma a lak ṭhat avangin Pradhan Mantri Fasal Bima Yojana (PMFBY) award a dawng a ni. Kum 2016 aṭang khan PMFBY hi kalpui ṭan a ni a, district hrang hrangah kalpui a ni. Mizoram-a Siaha district chuan Pradhan Mantri Krishi Sinchayee Yojana (PMKSY) award a dawng a, kum 2015 aṭang khan Mizoram sorkar chuan PMKSY hi a kalpui ṭan a ni. Assam-a Sivasagar district chuan Deendayal Upadhyaya Gram Jyoti Yojana (DDUGJY) award a dawng bawk.
Prime Minister Narendra Modi chuan kum 2015 khan DDUGJY a tlangzarh a, hei hi ram chhung hmun hrang hranga eng la luh lohna hmunah te eng pek vekna tura duan a ni. DDUGJY scheme hmang hian kum 2018-ah chuan ram chhunga khua zawng zawngah eng pek vek tum a ni a, hmarchhak state-ahte pawh kalpui mek a ni.