Meghalaya sorkarin Judge hlui commission chaiman atan ruat

Meghalaya sorkar chuan Guwahati High Court judge hlui, Justice B D Agarwal chu North Garo Hills-a police leh civil mite inbeihna thleng chhuichiang tura din, judicial inquiry commission chairman atan a ruat.

State Chief secretary K S Kropha chuan, Agar­wal-a commission chair­man atan ruat a nih thu hi kar kalta Inrinni khan a puang a ni. Inquiry commission hian thla ruk chhungin sorkar-ah report a thehluh hman a ngai dawn tih Kropha chuan a sawi. Chief Minister Mukul Sangma chuan March 6-a police-te leh civil mite inkara buaina chhuak chhui chiang tur hian cabinet chuan commission din a remti tih sawiin, chak taka hma lak a ni ang, a ti. Chief minister hlui S C Marak chuan judicial inquiry din hi a lo rawt tawh a ni.

Police-te chuan Kal­dang-a check point-ah lirthei pathum chu ding turin an ti a, lirthei khalhtute hi ding duh loin an tlan tlang a ni. Hemi hnu hian buaina chhuak zuiin, silai hmehpuah a ni a, mi eng emaw zatin hliam an tuar a ni. He thil thleng avanga hliam tuarte hi state sorkar chuan cheng 20,000 ṭheuh a pe a, mawhphurtua puh police mi pahnih chu suspend an ni.