Aruanchal zirlaiin Assam-ah beih tawk

Arunachal Pradesh zirlai pakhat chuan Assam-a Residential Special School pakahatah beih a tawk a, thubuai ziahluh ngal a ni.

Residential Special School hi pianphunga rualban lote tana Society for Health & Education Development (SHED)-te'n an din a ni. Assam police-te chuan he thil thlenga mawhphurtua puh mi pathum te lakah thubuai an ziak lut nghal a ni. Mipa naupang kum riat mi he school-a zirlai chuan tunhnai khan beih a tawk a, Guwahati-a private hospital-ah dah luh niin, a hliam hi a na hle nia tarlan a ni. Sonapur police station-ah thubuai hi ziahluh niin, he thil kaihnawihah hian school manager Hiranya Saikia, warden Shanti Niketan Singh leh cook Kishan Kumar-te chu man an ni tawh.

He thil thleng hi pawl hrang hrangte chuan an dem thu an sawi tawh a, Kamrup DC M Angamuthu pawhin a dem thu sawiin, chhui chian a nih tur thu a sawi. Pawl hrang hrangte chuan chief minister Sarbananda Sonowal-ah hnen-ah memorandum an thehlut a, pawikhawihna thlen dan chhuichian an phut bakah, thil sual titute dan anga hrem an phut thu an tarlang a ni.

Assam State Commission for Protection of Child Rights (ASCPCR)-te chuan he school hian infrastructure a neih ṭhat loh bakah, a thawktute chu traning pek an ni lo tih an sawi a, khar turin an phut tih an sawi.

He school hi naupang tan a him tawk loa an ngaih thu te, pianphunga rualban lote tana tih ni mah se special school a nihna an hriat loh thu te an sawi a ni. ASCPCR chair person Runumi Gogoi chuan he thil thlen hnu hian he special school hi a tlawh a, thil awmdan a hmunah kalin a enfiah a ni.

He thil thleng chungchang hi Arunachal Pradesh Commi­ssion for Protection of Children hriattir an ni tawh bawk.