Meghalaya-ah tuilianin khaw sarih chim

Meghalaya-a South West Garo Hills district-a khaw sarih zet chu tuilianin a chim.

South West Garo Hills district-ah hian kar kalta Zirtawpni aṭang khan nasa takin ruah a sur a, hei hian tuilian a thlen a ni. Tuilian hian khaw sarih a chim tawh bakah, hmun hniam laia awm inkalpawhna leh thlai chinna hmun ṭhenkhat a chim bawk. Chief Minister Mukul Sangma chuan district thuneitute chu tuilian tuarte chhawmdawl hna thawk turin a hriattir.

Silkona khuaah chuan school eng emaw zat khar a lai lawk a nih thu, district deputy commissioner Cyril V Diengdoh chuan a sawi. V Diengdoh chuan Zikzak Community & Rural Development block huam chhunga khaw sarih - Silkona, Nandirchar, Be­paripara, Hridaypur, Das­para, Patelipara leh New Kalaichar-te chu tuilian hian a chim tih a sawi.

Mahendraganj area-ah pawh sangha khawina dil eng emaw zat chu tuilian hian a chim a, district Disaster Management-te chuan hma an la nghal a ni. Tuilian avang hian thi leh hliam an awm hriat a ni lo. April thla laihawl khan thlipui na takin Meghalay hmun ṭhenkhat a lo nuai tawh bawk a, hun eng emaw chen chu inkalpawhna bakah power a khaihlak a ni.