Railways-in hmarchhak-a tuilian tuar state-te Chhawmdawlna hmanrua a thlawnin phurhsak dawn

Railways chuan Assam leh hmarchhak state danga tuilian tuar state-te tan chhawmdawlna hmanruate chu a thlawn vekin a phurh sak dawn tih a sawi.

North East Frontier Railways chuan a thlawna hmanrua an phurhsak tur hian inter-state leh intra-state a huam dawn a; parcel van/second class, luggage cum guard leh goods train-ten phurhsak an ni dawn tih a sawi a ni.

Ram chhung hmun dang aṭanga hmarchhak biala tuilian tuarte tana hmanrua thawnah hian freight charge lak a ni dawn lo a, ancillary charge pawh lak a ni dawn lo bawk.

NGO-te chuan rel hmang hian hmarchhak biala tuilian tuarte chhawmdawlna hi phurh man engmah chawi loin an thawn thei dawn a, mahse divisional railway manager-ten an thil thawn tur chu an pawmsak phawt a ngai ang. NGO-ten hmanrua an thawn hi a lo dawngtuah district magistrate/deputy commissioner an nih a ngai bawk a ni.

Assam state-a tuilian chuan ziaawm lam a pan ṭan a, mahse tuilian vang hian mi nuai 21 velin harsatna an la tawk a ni. Silchar khawchhung dinhmun pawh a la ṭha lo hle. April thla hnuah Assam-ah hian tuilian leh leimin vangin mi 134 an thi tawh a, district 18-a relief camp 538-ah mi 1,91,194 an la khawsa mek bawk.

Chief minister Himanta Biswa Sarma chuan nimin khan Bajali district-a Patacharkuchi tlawhin, Kaldia lui lianin harsatna a thlen dante a enfiah. Bajali district-a tuilian tuar mi ṭhenkhatte a kawm nghal bawk a, CM hi cabinet minister Ranjeet Kumar Dass-a'n a ṭawiawm.