Assam-a hnam parukte ST status pe dawn

Union minister of state for Home Kiren Rijiju chuan Assam-a hnam hrang paruk te chu sorkar laipuiin Scheduled Tribe (ST) status pek a remtih thu Thawhṭanni khan a sawi.

Minister Kiren Rijiju chuan heng hnam parukte aiawh ṭheuhte chu meeting a neihpui a, he thu hi a sawi a ni. He hun hi Home Ministry-a Special Secretary (Inter­nal Security) Rina Mitra pawhin a hmanpui. Rijiju chuan Assam-a Other Backward Classes (OBC) hnam parukte hi ST status pek an ni dawn a, hemi zirchiang tur hian sorkar laipui pawhin committee a din tawh a ni, a ti. Committee chuan zirchianna hi June 30-ah sorkar laipuiah a thehlut ang a, sorkar laipui chuan a endik ve leh dawn a ni. Home Ministry official chuan hnam hrang hrangte himna chu ngaihpawimawh a nih thu sawiin, security chungcgang pawh hi committee chuan a zirtel dawn niin a sawi.

Scheduled Tribe status pek tura tih te chu - Moran, Muttock, Tai Ahom, Koch-Rajbongshi, Sootea leh Tea Tribe-te an ni. Heng hnam te hi BJP soprkar chuan ST status pek hi a lo tiam tawh nia sawi a ni. Heng hnam te hi a taka ST status pek an nih hunah chuan Assam mipui zahve, 50% chu tribal an ni tawh dawn a, assembly seat 126 awmah pawh tribal tana seat hauh a pun chhoh rin a ni.