AP leh Assam CM-te'n Subansiri Project tihkhawtlai duh lo

Arunachal CM Pema Khandu leh Assam CM Sarbananda Sonowal-te chuan Lower Subansiri Project kalpui mek chu tikhawtlai loa a hun tak zawh an duh thu Union Power Minister Piyush Goyal an hrilh.

Power megawatt 2000 pe chhuak thei tur Lower Subansiri Project hi hun eng emaw chen tihkhawtlai a ni a, hei hi ṭha an tih loh thu state pahnih CM-te chuan Union Minister hi an hrilh a ni. Goyal hian Thawh-

ṭanni khan Arunachal-a Hydro Power project kalpui dan hrang hrang thlitlaiin hun a hmang a, AP CM leh Assam CM-te'n an ṭawiawm a ni. AP CM Khandu chuan Lower Subansiri Project chu tikhawtlai loa a hun taka zawh a nih theih nan Assam CM chu thawhpuiah a sawm a, state mipuite chuan hawn hun an nghakhlel tawh tih a sawi. Assam CM pawhin project zawh thuai a nih theih nan a theih anga thawhpui a inhuam thu sawiin, Union Power Minister chu an harsatna tawh sutkian a nih theih nana hma lakpui turin a ngen ve bawk.

Arunachal-ah hian power project thawh lai mek eng emaw zat a awm a, hawn mai theih a awm nual bawk. Heng zingah hian Kameng (600 MW) leh Pare (110 MW) hydropower project-te chu telin, kumin chhunga hawn hman beisei an ni. Khandu chuan heng pro­ject pahnihte hi kumin chhung ngeia hawn a nih theih nan union minister Goyal chu North Eastern Electric Power Corporation Limited (NEEPCO)-te chak zawka hna kalpui tura nawr turin a ngen. Power megawatt 600 pe chhuak thei tur Kameng hi January 2018-a zawh hman tura tih a ni a, megawatt 110 pe chhuak thei tur Pare pawh kumin December thlaa hawn hman tura ruahman a ni.

Power ministry chuan project la zawh loh chhunzawmna turin, PM package hnuaiah cheng vaibelchhe 83.32 a ruahman a, ṭanpuina sum veibelchhe 580.89 a pek belh dawn bawk nia tarlan a ni. Hei bakah hian micro mini leh small hydro project atan sum eng emaw zat ruahman a ni.