Pawl hrang hrangten China chetdan duh lohna lantir leh

Arunachal Pra­desh-a pawl hrang hrangte chuan Thawh­lehni khan China sor­karin an state-a hmun pawimawh parukte hming a thlaksak duh lohna an lantir leh.

All Arunachal Pra­desh Students’ Union (AAPSU)-te chuan Thawhṭanni khan China sorkar chet dan duh lohna lantirna kawngzawh an lo huai­hawt tawh a, pawl hrang hrangin an thlawp thu an sawi. Thawhlehni khan zirlawi pawl leh Akhil Bharatiya Vidyarti Parishad (ABVP)-te chuan kawngzawh an huaihawt leh a, mipuiten an thlawp ṭha hle. Kawngzawh hi Raj Bhawan aṭangin ṭan a ni a, China demna thuziak te tarlan a ni. Kawngzawhte hian ‘Vande Mataram’ an sak bakah, ‘Bharat Mata ki Jai’ tih chu an auchhuahpui bawk.

Delhi University-a an cultural secretary Rakshapa chuan, pawl hrang hrangte kawngzawh hi an thlawp thu sawiin, zirlaite chuan China sorkar chetdan an dem takzet thu a sawi. ABVP hruaitu Himang Verma pawhin, Arunachal-a hmun paruk ngawt mai China sorkarin Chinese

ṭawnga an hming a thlak chu an hrethiam lo takzet tih a sawi a, pawmzam mai theih a ni lo, a ti. Verma chuan, "Arunachal Pradesh hi India ram a ni a, hetih lai hian China sorkarin kan chenna Subansiri district chu Mila Ri tiin a thlak a, hei hian rilru a tina takzet a ni" tiin a lungawi loh thu a sawi. China chuan media hmangin Arunachal mipuite chu a run mek a, a thu hnuaia an awm theihna turin kawng hrang hrangin hma a la niin a sawi.

Chinese Civil Affairs Ministry chuan April 14 khan Arunachal-a hmun paruk chu an hming thlak a nih thu a tarlang a ni. Arunachal chu South Tibet ram bung pakhat a nih thu te, Tibet chu China sorkar rorelna hnuaia a awm thu leh, Arunachal chu a ram chin huam chhunga awm a nih thu te a tarlang a ni. Hei hi Arunachal-a pawl hrang hrangte chuan duh loin lungawi lohna an lan tir a, state sorkar pawhin sorkar laipui chu na zawka China chhang let turin a nawr a ni.