Tripura-ah Hmarchhaka IT Hub lian ber hawng

Hmarchhaka Information Technology (IT) Hub lian ber chu Thawhṭanni khan Tripura khawpui Agartala-ah hawn a ni.

State Chief Minister Manik Sarkar chuan hmar­chhaka IT Hub lian ber leh ram chhunga parukna ni phak hawn a ni ta chu lawmawm a tih thu sawiin, hei hian a taka e-governance kalpuina turah a ṭangkai hle dawn a ni, a ti. Hei hian ṭhalai tam tak tan hna thawh tur a siamsak dawn a, software siam leh thawn chhuah kawngah state-in nasa taka hma a sawn a beisei tih a sawi. Ministry of Electronic and Information Technology leh Software Technology Parks of India (STPI) ṭangkawpte chuan hmarchhak-ah IT HUb paruk din leh turin hma an la mek niiin a sawi bawk.

IT Hub din nan hian cheng vaibelchhe 50 hman ral a ni. A hawnna hi IT Minister Tapan Chakraborty, Industries and Information Technology, Principal Secretary M. Nagaraju leh Software Technology Parks of India (STPI) Director General Omkar Rai-te'n an hmanpui a ni.