Assam : Modi-a'n Asia khawmualpuia lei sei ber a hawng dawn

Prime Minister Narendra Modi chuan May 24 khian Asia khawmualpuia lei sei ber, Brahmaputra lui-a Dhola-Sadiya bridge chu a hawng dawn.

Dhola–Sadiya lei hi Assam leh Arunachal Pradesh inkalpawhna tur a ni a, km 9.15 zeta thui a ni. Prime minister office (PMO) chuan Modi-a'n lei a hawn tur thu hi official-in a puang tawh a, he thu hi Assam sorkar pawhin Thawhlehni khan a puang a ni. PMO chuan, Central-a BJP kaihhruai NDA sorkar chuan ram chhung hmun hrang hrangah project lian tham tak tak a kalpui mek tih sawiin, chung zingah chuan Dhola–Sadiya lei dawh pawh hi telin, Asia khawmualpui mai bakah khawvel huapa chhuanawm a tling phak niin a sawi. March 7, 2017 khan Modi vek hian Ahmedabad-Mumbai National Highway-a lei dawh chu a lo hawng tawh bawk tih a tarlang. He lei hi km 1.4-a sei a ni a, ram chhunga lei sei berte zing a mi a ni a, a senso hi cheng vaibelchhe 379 zet a ni.

Prime Minister hian tun hnai khan South Asia-a road tunnel thui ber a lo hawng tawh bawk a, km 9.2 zeta thui a ni. He tunnel hi Jammu and Kashmir-a Chenan-Nashri inkalpawhna tura siam a ni. Tunnel-ah hian ventilation mumal taka siam a ni a, hei hi India rama a hmasa ber a nih bakah, khawvel huap pawhin a parukna chauh a la ni. Vur tawlh leh thil dangah te a him tura ngaih a ni bawk.

Assam Chief Minister Sarbananda Sonowal chuan tun hnai khan national security advisor Ajit Doval chu New Delhi-ah hmuin, Arunachal nena an inkalpawhna tur Dhola-Sadiya bridge chungchang hi a lo sawipui tawh bawk. Lei dawh hna hi kum 2011 khan ṭan a ni a, a sensoah hian cheng vaibelchhe 950 sen ral a ni. Dhola-Sadiya bridge hi tun dinhmuna ram chhunga lei sei ber, Mumbai Mahim Bay-a Bandra Worli lei aiin km 3.55-in a thui zawk a ni.

PM Modi hian a cham chhung hian Assam-a All India Institute of Medical Sciences (AIIMS) sakna tur lung phum a phum nghal bawk ang. AIIMS hi Kamrup district-a Changsari-ah sak a ni dawn a, a sakna tur lungphum hi May 24-ah phum a ni ang. Prime Minister office chuan Modi-a'n AIIMS lungphum a phum tur thu hi official-in a puang tawh a ni. AIIMS sakna atan hian Changsari-ah ram acre 571-a zau ruahman a ni a, a sakna atan hian sorkar laipui chuan cheng vaibelchhhe 1,000 ruahman a ni. Hetih lai hian a dinna hmun tur chungchangah hun rei tak chhung buaina a awm a, Raha-te chuan Changsari-a din duh loin nasa takin an dodal a ni. State sorkar pawhin hun rei tak chhung a hmun tur thlan chungchangah hian thutlukna a siam lawk thei lo a ni.