Sorkar laipuiin tribal customary law A ngaipawimawh : P.P. Chaudhary

Union Minister P.P. Chaudhary chuan sorkar laipuiin tribal customary law a ngaihpawimawh thu a sawi.

Central-a Bharatiya Janata Party (BJP) kaih­hruai NDA sorkar chuan tribal customary law a ngaihpawimawh sak tih sawiin, hnam hrang hrangte dikna chanvo humhalh chu a tum ber pakhat a nih thu a sawi. Minister of State for IT and Law and Justice P.P. Chaudhary chuan Thawhlehni khan Naga­land a tlawh a, he thu hi a sawi a ni. Tribal customary law zir chiang tur hian sorkar laipui chuan Parliamentary Stan­ding Committee a din a, committee hian zirchianna an neih hnuah report an thehlut tawh tih a sawi. Sorkar laipui chuan report hi a zir chiang mek a, thutlukna puan a ni thuai dawn tih a sawi.

Union minister chuan hmarchhak state - Na­ga­land, Meghalaya, Mizoram leh Arunachal Pradesh-a tribal-te chu a ngaihpawimawh thu sawiin, an dikna chanvo humhalh sak turin theih­tawp chhuaha hma lak a ni, a ti. Tun hnaia Nagaland-a tualchhung buaina chhuak chungcgang sawi chhuakin, High Court leh Supreme Court-te chu thubuai chingfel theitu awmchhun an ni, a ti. Chief Minister T.R. Zeliang-a kaihhruai sorkar chuan Urban Local Bodu (ULB) election-a hmeichhe tana seat 33% hauhsak tura thutlukna a siam a, hei hi tribal-te chuan duh loin nasa takin an dodal a ni.

Hei hian tualchhung buaina chawk chhuakin ULB election neih tura ruahman pawh, tribal-te'n nawrh an huaihawt avangin a hun sawn a ni a, inthlan neih leh hun tur puan a la ni lo. Tribal-te chuan sorkar thutlukna chu sut leh turin an phut a, lungawi lohna lantira buaina chhuakah nunna chan an awm bakah, sorkar building leh lirthei eng emaw zat hal leh tihchhiat a ni. Tribal-te chuan hmeichhe tana seat hauhsak hi tribal customary law kalh a nih thu an sawi a, ram danpui Article 371-A kalh a nih thu te an sawi a ni. Sorkar laka lungawi loten chief minister TR Zeliang-a bang tura an phut avangin, a aiawh turin Naga People’s Front hruaitu Shurhozelie Liezietsu chu Chief Minister atan lakluh a ngai hial a ni.

Zelaing hian a lalṭhuthleng kalsan mah se, sorkarah hna pawimawh tak a chelh zui thung.