Manipur sorkarin People’s Day hmang Ṭan dawn

Manipur Chief Minister, N Biren Singh chuan May thla atangin People’s Day an hman ṭan tur thu a sawi.

Manipur-ah hian BJP kaihhruai sorkar a ding a, mipuiten minister leh MLA-te awlsam zawka an dawr theihna turin sorkar thar chuan mipuite tan kawng a hawn sak dawn a ni. Sorkar official chuan, thla tina ni 10-na chu People’s Day atan hian a hmang ṭhin dawn a, he niah hian tlangrama chengte chuan awlsam zawkin minister leh MLA-te an dawr thei dawn a ni. Tlangrama chengte chuan ni 10 ni hian Chief Minister chu zing dar 10 aṭanga, tlai dar 4 inkar chhungin an dawr thei dawn a ni. Ni 10 ni hi sorkar pisa chawlh a nih chuan a ni dawt lehah People’s Day hi hman ṭhin a ni ang.

State sorkar chuan People’s Day hi ni 15-naah hman turin a rel bawk a, hemi ni hian Chief Minister, Deputy Chief Minister, Minister, Chief Secretary, DGP, administrative secretary, Head of Department, Deputy Commissioner, SP leh SDO bakah BDO-te chu mipui nawlpui tana dawr theih turin a ti a ni. Biren Singh-a kaihhruai sorkar chuan People’s Day hman anih tur thu hi a lo puang tawh a, hei hian a tum ber chu mipui nawlpui ten awlsam sawka sorkar mi pawimawhte an dawr theih nan leh, langtlang sorkar din a nih theih nana ruahmanna a ni.