Arunachal : BJP-ah Congress Councillor-te lawmlut

Arunachal Pradesh-a Congress Councillor mi 25 zet chu Ningani khan BJP-ah lawm luh an ni.

BJP-a lawmluh te hi Itanagar Municipal Council (IMC)-a councillor ni laite an ni a, state chief minister Pema Khandu leh BJP state president Tapir Gao-te chuan heng mite lawmluihna inkhawm hi an hmanpui a ni. Khandu chuan, Congress councillor-te chu thinlung taka a lo lawm thu sawiin, hmasawnna hna thawhna kawngah inlungrual taka thawhho puiah a sawm a ni. Prime minister Narendra Modi-a kaihhruai sorkarah hmarchhakin nasa taka hma a sawn thu sawiin, Arunachal chu he hmasawnna chhawrtu zingah hian a tel mek a ni,a ti. BJP kaihhruai sorkarah mipuiten rinna an nghat a, mipuite thlawpna avangin hma lam panin an kal zel tih a sawi. BJP chauh chu danglamna tak tak thlen thei sorkar awm chhun niin a sawi bawk.

Arunachal BJP president Tapir Gao pawnin councillor 25-te lawmna thu sawiin, BJP kaihhruai sorkar an ring ngam chu lawmawm a tih thu a sawi. Councillor-te chu hmasawnna kawnga thawhpuiah sawmin, Khandu-a kaihhruai sorkarin mipuite rawngbawl hna a thawhna kawngah a tam thei ang ber tha thawh turin a sawm a ni. State khawpui Itanagar tan chauh an thawk dawn lo tih sawiin, state hmasawnna turin an thawk dawn tih a sawi bawk. IMC-ah hian Congress party chuan councillor 30 a nei a, chung zinga 25-te chuan BJP hi an zawm a ni. An zingah hian chief councillor Kipa Kaku leh deputy chief councillor Tarh Nachung pawh an tel a ni.