Assam Accord nuaibo a thiang lo : Rajnath

Union Home Minister Rajnath Singh chuan Assam leilung fate himna chu ngaihpawimawh a nih thu sawiin, Assam Accord chu nuaibo a thiang lo tih a sawi.

Ningani khan All Assam Stu­dents’ Union (AASU) leh Assam sorkar palaite chuan union home minister hi an kawm a, Assam Accord chungcgang an sawiho a ni. Rajnath Singh chuan, "Engti kawng mahin Assam Accord hi thlauhthlak theih a ni lo a, indigenous people-te himna leh din chhuahna turin vawnnun reng a ngai zawk a ni. Ram danpui pawhin an himna turin dan a zam a, chu chu khawih danglam leh siamrem theih thil a ni lo" a ti. Sorkar laipui chuan Assam Accord nihna leh a chanchinte a zirchiang mek tih a sawi bawk. Hemi chungcgangah hian sorkar laipui chuan state sorkar leh pawl aiawhte chu hmalakpui a duh tih sawiin, thawhopuiah a sawm a ni.

Meeting-ah hian National Regis­tration (NRC) kalpui mek chungcgang sawilan a ni bawk a, NRC chu indigenous people-te himna tura kalpui a nih thu union minister chuan a sawi. Indo-Bangla border chungchang pawh sawilan niin, hna ṭan a nih tawh thu tarlan a ni a, hei hi ram mipuite himna tura tih a ni. NRC hi ṭhenawm ram Bangladesh aṭanga dan loa Assam-a lutte danna tur leh, khua leh tui nihna pek an nih lohna tura kalpui a ni a, hna hi zawhfel a ni hnai tawh. NRC-ah hian kum 1971 hnu lama Assam-a lutte chu ziahluh theih an ni lo a, khua leh tui nihna pek theih an ni lo bawk.

Rajnath Singh chuan Accord chungchang ngaihtuah tur hian sorkar laipui, state sorkar leh AASU aiawh awmna committee din a nih tur thu a sawi a, committee hian zirchianna a neih dawn bakah, a vil reng dawn a ni, a ti. AASU Adviser Samujjal Bhattacharyya chuan AASU-te thil phut hrang hrangte a tarlang a, an thil phut zingah hian ditrict tina Special Task Force din te, dan loa Bangladesh aṭanga lutte dap chhuaka an rama thawn haw an nih theihna tura rawtna te a tel a ni. Home Ministerial level meeting hi kum 21 zet liam hnuaa an neih lehna hmasa ber a ni a, Union Home Minister, Assam Chief Minister Sarbananda Sonowal leh All Assam Students’ Union aiawhte an tel a ni.