Assam tuilianah mi 5 thih belh leh

Assam state-a tuilian vangin Thawhlehni khan mi panga an thih belh leh a, tuilian vang hian mi nuai 24.92 ten harsatna an la tawk.

Silchar khawpui hmun tam tak chu tuiin a la chim a, kar khat chuang tuilian hi an tuar tawh a ni.

Thawhlehnia tuilian vanga thi zinga pathum hi Cachar district a mi niin, Morigaon leh Dhubri-ah mi pakhat ve ve an thi bawk. Heng mite nen kumina Assam-a tuilian vanga thi hi 139 an tling tawh. Cachar district-ah mi pahnih leh Chirang district-ah mi pakhat chin hriat lohin an awm bawk.

Brahmaputra, Beki, Kopili, Barak leh Kushiraya luite chuan hlauhawm chhinchhiahna an la pel a, mahse lui tam zawkah erawh chuan tui a kam ṭan tawh a ni.

Chief minister Himanta Biswa Sarma chuan Thawhlehni khan Bajali leh Barpeta district-te tlawhin, tuilian vanga harsatna tawkte a kawm. Hemi ni vek khan tourism minister Jayanta Malla barua chuan Silchar tlawhin, tuilian tuarte chhawmdawl leh chhanchhuah hna thawh mekte a enpui. National Health Mission (NHM) team, Assam Mission director MS Lakshmi Priya kaihhruai chuan Silchar hi tlawh bawkin, medical facility hrang hrangte an enfiah a ni. Relief centre natna hri leng tur ven hna thawkin medical officer leh paramedical staff-te chuan health camp an nei a, Thawhlehni khan mi 7,212-te an endik hman a ni.

Cachar deputy commissioner Keerthi Jalli chuan tui ip (water pouch) leh tui tihthianghlimna tablet-te sem a nih thu sawiin, Silchar-a tui a len phahna, Bethukandi-a tui lianna chhia pawh siamṭhat hna thawh mek a ni, a ti.