China-in Arunachal bakah Taiwan hming thlaksak leh

China sorkar chuan Arunachal Pradesh-a hmun paruk zet an hming a thlak hnuah, Taiwan sawi nana “Zhonghua Taipei” tih hman ṭhin chu “Zhongguo Taipei” tiin a thlak sak leh.

China sorkar hian Tibetan sakhaw puithiam Dalai Lama-a'n Arunachal-a Tawang a tlawh duh lohna lantirin, Arunachal-a hmun parukte hming chu Chinese ṭawngin a thlak a, hengte hi Dalai Lama leh Tibet nena inzawmna nei nia sawi a ni. Chinese ministry chuan he thil hi India sorkarin Dalai Lama-a Arunachal tlawh a phalsak duh lohna leh, a chhan letna a nih thu a sawi. Arunachal chu South Tibet ram bung pakhat a nih thu leh, Tibet chu a rorelna hnuaia awm a nih thu sawiin, Tibetan sakhaw puithiamin Arunachal a tlawh chuan ram pahnihte inkarah boruak ṭha lo a hrin chhuah theih thu a tarlang.

He thil thlen hnu lawk hian Beijing chuan tunhnai khan Taiwan sawi nan “Zhonghua Taipei” tih hman ṭhin chu “Zhongguo Taipei” tiin a thlak sak leh ta a ni. Taiwan chuan 'Zhonghua Taipei' tiin a insawi ṭhin a, hei hi Republic of China tihna niin, China mainland an ni lo tih a lantirna a ni. Beijing chuan Nilaini khan thuchhuah siamin, hming thlak a nih thu hi a tarlang a, Taiwan chu a rorelna hnuaia awm a nih thu chiang takin a sawi. Taiwan hi China lak aṭang hian Chiang Kai-Shek rorel lai kum 1949 khan a indang a, mahse tun thlengin China rorelna hnuaiah a la kun a ni. Hetihlai hian Taiwan chuan China ram bung pakaht anga sawi hi a pawm lo thung.