Manipur sorkarin a hmachhawpte puang
Manipur Chief Minister N Biren Singh chuan state sorkar hmachhawp hrang hrangte chu Thawhlehni khan a puang.
CM Biren chuan May thla aṭangin Khuman Lampak sports complex-ah sports academic session kalpui ṭan tum a nih thu sawiin, a thawktu tur pawh lak thuai a ni dawn tih a sawi. Koutruk-a National Sports University sakna tur chu hna ṭan thuai beisei a nih thu sawiin, university complex-ah Helicopter ṭumhmun siam a ni dawn tih a sawi. National Sports University dinna tur hi sorkar laipui chuan a pawmpui tawh a, Prime Minister Narendra Modi chuan May thla khian a sakna tur lungphum a phum dawn a ni.
Biren Singh chuan traffic lama an harsatna tawh ṭhin sukiang turin hma lak a ni dawn tih sawiin, Imphal East leh West-ahte Superintendent of Police hran dah an ni dawn, a ti. Cyber crime police station din a ni dawn tih sawiin, cyber crime hluar zel tur chu a theih anga tihtlem tuma hma lak a ni ang, a ti. Khum 100 awmna tur cancer hospital din a ni dawn tih sawiin, khum 50 awmna tur mental hospital pawh din thuai a ni dawn tih a sawi. Hei bakah hian state chhunga kut hna thawka eizawng chhungkaw sing chuang zette hamṭhatna tur ngaihtuah sak an ni dawn tih a sawi bawk.