Hel ṭanpuia puh Nagaland sorkar official 3 man
National Investigation Agency (NIA)-te chuan Naga hel - National Socialist Council of Nagaland-Khaplang (NSCN-K) ṭanpuia puh Nagaland sorkar official mi pathum te chu Nilaini khan an man.
NIA-te'n an man te chu Social Welfare Deparment-a Joint Director Tulula Pongen, Land Resources Deparement Joint Director Alienba Pangjung Jamir leh Land Resources Deparment-a Cashier K Lashito Sheqi-te an ni. An vai hian hel pawl NSCN (K)-te'n dan kalha mipuite hnen aṭanga chhiah an khawnnaah inhnamhnawiha puh an ni. NSCN (K)-te hian Dimapur leh Kohima-ahte sorkar leh pawl hrang hrang hnen aṭangin dan kalhin chhiah an khawn ṭhin nia sawi a ni. Sorkar official an man te hian sorkar sum chu hmangin hel pawlte hi an ṭanpui nia sawi a ni. NSCN (K) bakah hian hel pawl dang - National Socialist Council of Nagaland - Reformation (NSCN-R), Federal Government of Nagaland (FGN) leh Naga National Council (NNC)-te pawh an ṭanpui thin dawn nia tarlan a ni bawk.
NIA-te hian deparment office an dapnaah document ṭhenkhat an man a, heng zingah hian NSCN (K)-te'n demand letter an pek te leh, payment receipt-te pawh a tel a ni. Special NIA Court chuan an mi man zinga mi Jamir lehSheqi-te chu police-te kutah ni nga chhung awm turin a ti a, hetih lai hian an zinga pakhat Pongen chu a hriselna lam avangin hospital-ah enkawl tura dah a ni thung.