Sena MLA helte hi kan mikhualte an ni : Assam sorkar

Maharashtra-a rorellai Shiv Sena MLA hel, an hruaitu Eknath Shinde hoa kar khat zet Guwahati-a inkhuarte chu an state mikhualte an ni tih Assam sorkar chuan a sawi.

Assam parliamentary affairs minister Pijush Hazarika chuan Shiv Sena MLA helte chu mikhual anga an lo en thu leh, an theih anga an lo puih thu a sawi a ni. Nilaini khan Hazarika bakah Assam-a BJP MP Pallab Lochan Das, MLA Diganta Kalita leh Guwahati police commissioner Partha Sarathi Mahanta-te chuan MLA helte hi an awmna hotel aṭangin Kamkhya temple-ah an kalpui a ni.

Hazarika chuan, "Maharashtra MLA-te hian sorkar thuneitute hnenah Maa Kamakhya temple tlawh an duh thu an hrilh a ni. Chief minister Himanta Biswa Sarma chuan kan mikhualte an nih angin kalpui turin min ti a ni," a ti. An state mikhualte an theih anga lo puih chu state sorkar tih tur a nih thu a sawi bawk.

Guwahati hotel-a Maharashtra MLA hel awm zat leh, an thil tum chungchang chu an ngaihven ve lo tih Hazarika chuan a sawi.

Shiv Sena MLA helte hian Maharashtra-a National Congress Party (NCP) leh Congress party nena ṭangrual sorkar an siam mek chu duh loin, NCP leh Congress thawhpuina titawp a, BJP nena sorkar thar siam an duh thu an sawi tawh a ni. MLA lungawi lote Guwahati-a inkulh chungchangah Assam-a BJP sorkar chuan a lo buaipui nasat avangin eptu lamte sawisel pawh a hlawh phah hle. Tuilian vanga state pumin buaina an tawh laiin, sorkar chuan Shiv Sena MLA chu a buaipui nasa mah mah niin an sawi a, Maharashtra-a Shiv Sena kaihhruai ṭangrual sorkar paihthlakna tura BJP ruahmanna vek niin an puh a ni.

Guwahati-a Shiv Sena MLA helte awmna hotel-ah sorkar chuan venhimna khauh taka siamin, Assam police-a reserve battalion leh commando unit-te a dah a, hei bakah hian Jalukbari police station aṭangin police eng emaw zat leh paramilitary force-te duty tir an ni bawk.