2023 Meghalaya inthlanah TMC-in chuh vek dawn : Abhishek Banerjee

Trinamool Congress (TMC) national general secretary Abhishek Banerjee chuan nakkuma Meghalaya legislative assembly inthlan neih turah, TMC chuan seat awm zawt zawng seat 60-ah a chuh vek dawn a ni, a ti.

West Bengal-a rorellai, TMC hian hmarchhak lamah an huang zauh tumin ṭan an la chho mek a ni. Abhishek Banerjee hian Nilaini khan Shillong-ah inthlan lo awm tur atana inbuatsaihna kawng khat atana missed call hmanga membership drive an siam chu a tlangzarh a ni. Banerjee hian Meghalaya-a party state office pawh hawng nghalin party hruaitute a kawm bawk. An zingah hian chief minuister hlui, Mukul Sangma pawh a tel. Sangma leh Congress MLA dang 11-te chuan nikum November thla khan Congress party chhuahsanin TMC hi an zawm.

TMC hian kum 2018 assembly inthlanah seat la lo mah se, nikum November thlaa Congress party MLA 17 zinga 12-ten an party an zawm tak avangin Assembly-ah eptu party lian ber a ni mek a ni.