Manipur-a leiminah mi 6 an thi

Manipur-a Noney district-ah Nilaini zan khan leiminah mi paruk an thi a, chin hriat lohin mi 60 vel an awm bawk.

Chhiatna thlenna hmun hi Makhuam khuaa rel kawng tur an siamna, Tupul bulah a ni. Leimin vanga thi zinga pahnih territorial army mi leh sa an ni a, chin hriat loha awm zingah hian Northeast Frontier Railway (NRF) staff-te pawh an tel. Leimin vang hian Tamenglong leh Noney district inkalpawhna pawh a ping vek a ni.

Indian Army leh Assam Rifles sipaite chuan leiminna hmunah hian chhanchhuah hna an thawk nghal a, mahse lei min thar a awm zel avang leh, khua a chhiat zui zel avangin duh angin hna an thawk chak thei lo a ni. A ṭul huna hman turin Army helicopter-te pawh inrin tir an ni bawk.

Leimin hian Noney district-a Ijei lui chu a hnawh tel a, hei vang hian tui a len thar leh hlauhthawnna a lian hle. Noney deputy commissioner Haulianlal Guite chuan mipuite chu inring tura awm tur leh, chhiatna nasa zawk thleng palh thei laka inveng lawk turin a chah.