Congress party chuan tun hnaia by-election neih kaihhnawiha state chhunga tharum thawhna thleng chungchangah rorellai, Bharatiya Janata Party (BJP) chu puhin na takin a sawisel. Buaina thlengte chhui chiang tur hian Election Commission an phut bawk. 
Congress party thupuang­tu Ajoy Kumar chuan, "Buaina chhuakte hi inthlan kaihhnawih anih avangin,Election Commission kal­tlangin heng thil thleng chungchangah independent inquiry nei turin kan phut a ni. Hei bakah hian Congress state office leh party worker-te venghim turin kan phut bawk," a ti. Kumar chuan eptu party-te an rawn lian chho dawnin an hria a, an dinhmun a nghing nia an hriat chuan BJP chuan buaina an siam ziah niin a puh. 
Pathianni khan assembly seat palia by-election result puan a ni a, BJP in seat pathum leh Congress-in seat pakhat an la a ni. Inthlan zawh hnuah CPI (M) chuan mi tu tih hriat lohten an party office an bei niin an sawi a, Congress party an party mi leh sate beih tawkin mi 20 in hliam an tuar a, an zingah hian Tripura Congress hotu Birajit Sinhna pawh a tel thu an sawi bawk. 
Kumar chuan, "Ram chhung hmun hrang hrangah BJP chuan an khingpuite nawr hniam tumin tharum an hmang zel a, hei hi thil pawi tak a ni. Chief election commissioner biain, BJP-in tharum thawhna an thlen dante chu kan sawipui a ni," a ti. Election Commission lam pawhin inthlan kaihhnawiha tharum thawhna thleng ṭhin chu pawi an ti hle a ni, tiin a sawi.