AP-ah Covid-19 vanga thi awm belh leh
Arunachal Pradesh-ah Thawhṭanni khan Covid-19 kai pakhat a thi a, he hri vanga thi hi pathum an awm tawh a ni.
Hripui vanga thi hi kum 32 mi, zunthlum natna nei sa niin, a dinhmun a ṭhat loh avangin Pathianni khan Lekhi-a Covid Care Centre aṭangin Tomo Riba Institute of Health and Medical Sciences (TRIHMS), Naharlagun-ah sawn a ni. Mahse ṭhat lam a pan thei lo a, Thawhṭanni khan a thi ta a ni.
June 25 khan hri kai pakhat, hmeichhe kum 43 mi chu a thi a, July 6 khan mipa kum 40 mi chu Covid-19 vang hian a lo thi tawh bawk. An pahnih hian kal (kidney) ṭha lo ve ve an ni.
Arunachal Pradesh-ah hian Thawhṭanni khan hri kai hmuh chhuah thar mi 27 an awm a, an zinga 10 chu ITBP sipai, Assam aṭanga haw an ni. Heng mite nen hian hri kai hmuh chhuah tawh hi mi 387 an awm tawh.
AAPSU in sakhaw biakna hmun khar vek phut
All Arunachal Pradesh Students’ Union (AAPSU) chuan an state-a coronavirus darh zel tur venna atana sakhaw biakna hmun hrang hrangte chu khar tir vek turin an phut. Khar tura an phut zingah hian prayer centre-te pawh a tel.
Pathianni khan Naharlagun-a Prayer Centre-a awm hmeichhe pakhat chuan Covid-19 a kai tih hriat chhuah a ni a, hei vang hian zirlai pawl hian mipui awmkhawm theihna hmun, sakhaw hmun pawimawhte chu khar an phut a ni.
AAPSU vice president Meje Taku chuan Covid-19 protocol bawhchhiate chungah na taka hremna lekkawh tura sorkar an phut thu sawiin, sakhaw thila punkhawmnte hmunte zalen taka dah a nih chuan Delhi-a Nizamuddin Markaz-a thil thleng ang kha an state-ah pawh a thleng ve thei a ni, a ti.