Assam-ah nikhata hri kai hmuh thar 1,000 chuang awm

Assam-ah hripui kai an pun belh zel a, Thawhṭanni khan hri kai hmuh thar mi 1,002 an awm leh a, an zinga mi 513 chu Guwahati khawpuia mi an ni. 

Hri kai hmuh chhuah tawh hi mi 17,807 an awm tawh a, an zinga mi 40 in thihpui tawhin enkawl dam hi mi 11,416 an awm tawh. Hri kai mek hi nimin thleng khan mi 6,348 an la awm. Thawhṭanni khan Assam-ah hian Covid-19 vangin mi pali an thih belh leh a, an zingah hian Gauhati Medical College Hospital (GMCH)-a senior doctor a tel. Hemi ni vek hian hri kai enkawl dam, enkawlna hmun hrang hrang aṭanga chhuah tir mi 522 an awm. 

Guwahati khawpuia hri kai an pun belh zel avanga June 28 aṭanga ni 14 chhung atana total lockdown puan chu kar khat dang pawhsei niin, July 19 zan dar 6 thleng atan pawhsei a ni tawh bawk. Health minister Himanta Biswa Sarma chuan hri darh tur venna kawng khat atan a tam thei ang test neih zel a ni tih sawiin, nimin thleng khan sample test neih tawh hi  5,63,482 a tling tawh tih a sawi.