AP-a hmun hming thlak zingah Dalai Lama kaihhnawih a tam : China expert

China sorkarin Tibetan sakhaw puithiam Dalai Lama-a'n Arunachal Pradesh a tlawh duh lohna lantira hmun hming a thlak parukte chu Dalai Lama leh Tibet nena inzawmna nei a nih thu China expert chuan Pathianni khan a sawi.

Jawaharlal Nehru Uni­versity-a Chinese pro­fessor Srikanth Kondapalli chuan, "China-in Aruna­chal-a hmun parukte hming an ṭawnga a thlak sak hi Dalai Lama leh Tibet nena inzawmna nei vek a ni. Hei hi India sorkarin Dalai Lama-a'n Tawang monastery a tlawh a phalsak duh lohna lantirna leh chhan letna an ni" a ti. Dalai Lama hian tun thla tir lam khan Tawang monastery hi a tlawh a, ni li a cham chhungin sakhaw thilah zirtirna a pe a ni. Hei hi China chuan duh loin, Tibet-a Dalai Lama a let leh hnuah Arunachal-a hmun parukte chu an hming a thlak a ni. Subansiri district chu Mila Ri tia thlak a ni a, he district hi Subansiri lui kianga awm niin, Arunachal-a lui lian berte zinga mi leh Brahmaputra lui fintu a ni.

Kondapalli chuan, Subansiri district hi Tibet mite chhuahka pawimawh tak a ni a, helai hmun kaltlang hian India ram hmun hrang hrang an pan ṭhin tih a sawi. Hming thlak zinga ami, West Siang district-a Mainquka chu India-in a ram chhunga a rinluhte zing ami a ni a, helai hmunah hian ram venhim hna thawktu sipai eng emaw zat a dah. Indian Air Force pawhin Advanced Landing Ground an dah a ni. Dalai Lama-a'n hmun a thlawh zinga pakhat Bumla pawh China chuan an ṭawngin Bumola tiin a thlak. He hmun hi kum 1962-a India leh China sipaite indona hmun kha a ni. Namaka Chu area pawh Namkapub Ri tia thlak a ni a, power siamchhuah theihna tur hmun ṭha tak a ni.

Professor Kondapalli chuan, China sorkarin hming a thlak zingah hian ram ṭha leh agriculture lama chhawr ṭangkai tur tak tak te, power siam chhuah theihna hmun te a awm niiin a sawi. China chhanlet nan hian India chuan India Aksai Chin leh Mansarovar area-te chu an hming a thlak sak ve thei tih a sawi bawk. Heng hmun te hi China ram huam chhunga awm a ni a, India chuan a ram chinah a chhal ve thung.

Tibetan sakhaw pui­thiam Dalai Lama hian April thla tir khan Assam leh Arunachal tlawh turin India a rawn lut a, hei hi China chuan na takin a khak. April 1 khan Assam a thleng a, April 4 khan Arunachal a pan leh a ni. AP-a a cham chhung hian India leh China ramri bula awm Tawang a tlawh a, hei hi China chuan thil pawmzam mai theih a nih loh thu leh, ram pahnihte inlaichina tichhe thei niin a sawi. Dalai Lama-a'n Tawang a chhuahsan hnu hian China chuan Arunachal-a hmun paruk zet chu an hming a thlak a, hei hian Aruanchal chu Tibet rambung pakhat a nih zia a pho lang niin a sawi. Tibet hi China rorelna hnuaia awm a ni.