Manipur leimin vanga thi pun belh zel

Manipur-a Noney district-a Nilaini zana Tupul-a rel kawng siamna hmuna leiminin a chhilh zinga ruang 10 lakchhuah a ni tawh a, official-te chuan leimin vanga thi hi mi 62 an tlin rin a nih thu nimin khan an sawi.

Thuneituten nimima report an tihchhuahah, leimin hian mi 81 a chhilh niin an sawi a, heng zinga 19 chu chhanchhuah an ni.

Leimin laia a minna hmuna awm, Territorial army mi leh sa 43 zinga pasarih chu an thi a, an zinga 15 chu chhanchhuah niin hliam an nei hlawm a, an zinga pathum chu an dinhmun a ṭha lo hle. Mi dang 23 chu nimin thleng khan an chin hriat a la ni lo.

Heng mite bakah leiminin a chhilh, contruction company - BIPL leh VCS hnuaia thawk mi 27 zinga 21-te chu leimin hian a la chhilh a ni. He chhiatna thlen laia awm, Railways engineer pathum bakah, tualchhung mi pakua-te pawh lakchhuah an la ni lo bawk.

Leimin nasa hian Noney district-a Jijei lui pawh a hnawh a, lui tui sang zel avangin tui len hlauhthawnna a lian hle. He lui hi a lian a nih chuan a chuanhnuai lama thlai chinna ramte a tichhe thei dawn a ni.

Chhiatna thlenna hmunah hian chhanchhuah hna thawh ni mah se, khua a chhiat avangin duh angin hna an thawk chak thei lo tih an sawi. Chhanchhuah hna leh leimin thenfai hna hi Indian Army, Assam Rifles, Territorial Army bakah central leh state disaster force-ten an thawk a, bulldozer leh hmanraw dangten an hmang a ni.

Noney district deputy commissoiner chuan mipuite chu fimkhur tura chahin, lui hnaih lamah kal lo tur leh, chuanhnuai lama awmte chu a theih ang ang insawnchhuak turin a ti. Leiminin hmun tam takah kawng a hnawh avangin National Highway 37 chu zawh rih lo turin a chah bawk.

Manipur-a chhiatna nasa tak thleng chungchangah prime minister Narendra Modi leh union home minister Amit Shah chuan chief minister N Biren Singh pawh an be tawh a, Amit Shah hian railway minister Ashwini Vaishnaw pawh a be bawk. PM Modi chuan leimin vanga thi chhungte a tuarpui thu leh, hliam tuarte pawh an dam ṭhat leh thuai a duhsak thu a sawi. Amit Shah chuan National Disaster Response Force (NDRF) team chu leiminna hmunah tirh ni tawhin, team dang pahnih pawh an kal leh mek tih a sawi.

Chief minister Singh chuan chhiatna thleng chungchangah hian emergency meeting a ko nghal a, chhanchhuah hna thawkna kawnga pui turin doctor-te pawh ambulance nen tirh an nih thu a sawi. He chhiatna thlenga thi chhungte chu sorkarin zángnadawmna, Rs nuai nga ṭheuh leh hliam tuarte chu Rs 50,000 ṭheuh a pek tur thu a puang nghal bawk.