Assam tuilianah mi 8 thih belh leh

Assam state-a tuilian vangin Ningani khan mi pariat an thih belh leh a, tuilian leh leimin vanga thi hi mi 159 an tling tawh.

Assam State Disaster Management Authority (ASDMA) chuan tuilian vanga thihna thlen thar lehna hi Nagaon, Lakhimpur, Barpeta, Biswanath, Dhemaji leh Morigaon district-ah a ni tih a sawi. Cachar district chuan tuilian hi an la tuar chhunzawm zel a, Silchar khawpui pawh tuiin a la chim chhunzawm zel a ni.

State chhunga lui lian - Brahmaputra, Beki, Kopili, Barak leh Kushiyra lui tuite pawhin hlauhawm chhinchhiahna an la pel vek.

Ningani khan chief minister Himanta Biswa Sarma chuan tuilian tuar mek district hrang hranga deputy commissioner-te chu virtual conference a neihpui a, tuilian vanga relief camp-a khawsa mek chhungkaw tinte hnenah Rs 3,800 ṭheuh sem turin DC-te chu a hrilh. ASDMA chuan tuilian tuar zinga mi nuai thum chuang chu state chhung hmun hrang hranga relief camp 551-ah an khawsa mek niin a tarlang.