BJP paih thla turin party dangte thawhpui kan inhuam : Tripura ex-CM Manik Sarkar

Tripura chief minister hlui, Communist Party of India-Marxist (CPI-M) hruaitu Manik Sarkar chuan kum 2023-a an state assembly inthlan lo awm turah, BJP paihthlak an nih ngei theihna turin party dang thawhpui an inhuam tih a sawi.

Ningania Agartala-a chanchinthar lakhawmtute a kawmnaah, Manik Sarkar chuan Congress MLA Sudi Roy Baram-an rorellai BJP paihthlak a nih theihna tura eptu party-te thawhho a ṭul thu a sawi chungchang a sawi zawmnaah hei hi a sawichhuak a ni. Sarkar chuan Baram chuan eptu party-te thawkho thei tura hma a la thei a nih chuan ṭha an tih thu a sawi. Theihtawpin BJP sorkar paihthlak a nih theihna tur leh, mi tam zawk an tel theihna turin an bei mek tih a sawi.

Sarkar chuan inthlan kaihhnawiha an state-a tharum thawhna thleng ṭhinah Left party worker-te chu a tuar nasa ber an ni tih a sawi. "Constituency pali-a by-election neihah Left party chuan seat khat pawh kan la lo chungin, rorellai party mi leh sate chuan Left party worker-te chu an bitum ber an ni tho a ni," a ti. By-election kaihhnawihah hian politics thila inbeihna ṭum 150 chuang a thleng niin Left MLA-te chuan an sawi bawk. Pawikhawihtu, rorellai party mite chungah police-te chuan engmah action an la lo tih an sawi bawk a ni.