JSU-in Covid-19 kaite hming puangzar turin ngen

Meghalaya-a Jaintia Students Union (JSU), Shillong Circle chuan state sorkar hnenah coronavirus kai hmuh chhuahte chu an hming puangzar zel turin a ngen a, hei hi contact tracing tih a awlsam phah zawk dawn niin an sawi. 

JSU public secretary Tiphimi Rymbai chuan sorkarin hri kaite hming a puanzar chuan, anmahni hnena inhnimhnaihna lo neite chu an inhre nghal zel dawn a, inkhung hrang nghalin hri darh tur venna atan pawh a pawi­mawh zawk dawn a ni, a ti. 

Border Security Force (BSF) leh Indian Army hnuaia sipaite chu test vek an ni em tih leh, sipaite hi state dang aṭanga an lo hawin sorkarin kaihhruaina a siam, ni 14 chhung inkhung hrang tura a tihte chu an zawm ṭha em tihte chian turin sorkar an phut thu an sawi bawk. Meghalaya-ah hian Covid-19 hmuh chhuah tawh hi mi 295 an awm tawh a, an zinga 178 chu BSF mi leh sa an ni. 

Thawhṭannia hri kai hmuh thar mi 18 zingah hian sorkarin khuahkhirhna dan a siam bawhchhia a, Greenword Resort, Khanapara-a inneih lawmnaa kal mi 41 zinga 10 an tel a ni. Health Services (MI) director Dr Aman War chuan inneihna kalte contact tracing neih a nih hnuin, inhnimhnaihna an neihpui mi 104 te chu hriat chhuah an ni tawh tih a sawi a, an zinga mi 78 chu nimin khan test  neih sak an ni.

Official-te chuan Covid-19 protocol bawhchhia a, Assam-a inneih lawmnaa kal mi 41 lakah Thawhṭanni khan thubuai thehluh a nih thu an sawi. Epidemic Diseases Act leh Meghalaya Epidemic Diseases COVID-19 Regu­lation, 202 hnuaiah Sardar police station-ah thubuai hi thehluh a ni. Deputy chief minister Prestone Tysong chuan sorkar chuan dan pal­zutte chungah ngaihhnathiam­na a nei dawn lo tih a sawi.