Manipur : Leiminin a chilh ruang 38 hmu tawh ; Chin hriat lohin mi 28 an la awm

Manipur-a Noney district-a leiminin a chhilhte ruang chu a ni lina atan nimin khan zawn chhunzawm zel a ni.

June 29 zana Tupul railway contruction camp-a leiminin a chilh zinga ruang 38 chu lakchhuah an ni tawh a, hetih lai hian mi 28-te chu chin hriat lohin an la awm.

Nimin zing khan ruang pali lakchhuah a ni a, an zinga pahnih chu Territorial Army mi an ni a, mi dang pahnihte hi hriatchian an la ni lo. Inrinni khan ruang pariat lakchhuah niin an zinga panga chu Territorial Army mi an ni a, pakhat chu construction company-a thawk a ni. Midang pahnihte erawh chu tute nge an ni tih hriatchian an la ni lo. Ningani khan ruang pariat leh, Zirtawpni khan ruang 13 lakchhuah an lo ni tawh bawk.

Leiminna hmuna awm mi 28-te chu nimin thleng khan an chin hriat a la ni lo a, an zinga 14 chu construction company pahniha thawkte niin, tualchhung mi panga leh railways mi pathum an tel.

Chhiatna thlenna hmunah hian National Disaster Response Force (NDRF), State Disaster Response Force (SDRF), state police,Assam Rifles bakah tualchhung mi volunteer-ten chhanchhuah hna an thawk a ni. Hei bakah hian excavator 30 hmangin leiminin lui a hnawhte thenfai mek a ni bawk. Mahse ruah a sur chhunzawm reng avangin hna an thawk chak thei lo a ni.

Defence thupuangtu chuan ruang zawn hna thawhnaah Through-Wall Radar bakah, uifing te hman an ni tih a sawi.