Silchar khawchhunga tui len chhan nia puh mi 1 man

Assam police-te chuan Barak luia tuilian danna siam tichhia a, Silchar khawpuiin tuilian an tuar phahna chhana puh mi pakhat an man tih an sawi. Hetih lai hian tualchhung mite chuan tuilian danna chu a hma aṭanga chhe tawh niin an sawi thung.

Police-te hian kar liam ta Zirtawpni khan Bethkundi area-a cheng, Kabul Khan chu an man a ni.

Khan hian Barak lui-a tuilian danna a tihchhiat lai chu video-in a la nia puh a ni a, he video hi Zirtawpnia chief minister Himanta Biswa Sarma-a'n lui kam a tlawh ṭum khan mipuite pawh a entir a ni. CM chuan he video-a ṭawng chu tunge a ni tih hrechhuak turin mipuite a ngen a, a hnuah Khan a ni tih hriatchhuah a ni ta a ni.

Senior police officer chuan video latu hi Khan a ni tih hriatchhuah a nih hnuah thu zawhfiah a ni a, a hnuah man zui nghal a ni tih a sawi. He pawikhawihna thlenga inhnamhnawih dangte manchhuah tuma hma lak mek a ni tih a sawi bawk.

Cachar district thuneitute chuan tun hnaia Silchar khawpuiin tuilian nasa tak a tawrh chhan chu misual ṭhenkhat Barak lui-a tuilian tur danna siamte an tihchhiat vang niin an sawi. Mahse tualchhung mite chuan tui a len hma, May thla aṭang khan a chhe tawh a, thuneitute lam pawh siamṭha turin an nawr fo niin an sawi thung. An ngenna te ngaihtuah sak an nih loh avangin, khawchhunga tui lut ṭhinte lui lamah a luan kir leh theihna turin tui lian danna siam hian a hreuh an siam a, mahse Barak lui tui nasa taka a rawn len tak avangin June 19 khan tui lian danna an haikhuar aṭang hian khaw chhungah tui hi a rawn lut leh tih an sawi a ni.

Chief Minister Sarma chuan Silchar khawpuia tuilian chu mihring vanga thleng niin a lo sawi tawh a, police-ah case pawh ziahluh a nih tawh thu leh, CID-in an chhui tur thu a sawi.

Hetih lai hian Assam Pradesh Congress Committee (APCC) secretary Sanjeev Roy chuan Bethukandi lui lian danna siam chu kum 2019 aṭang tawh khan a ṭha tawk tawh lo hle a, Congress party chuan siamṭha tura ngenin ṭum eng emaw zat memoranda pawh an thehlut a, mahse ngaihsak a hlawh lo niin a sawi. "District thuneitu, water resources department leh Assam sorkar chuan an ngaihven duh lo a. Tuna Silchar-a chhiatna thleng hi sorkar leh thuneitute fimkhur loh leh inthlahdah vanga thleng a ni," a ti.

Silchar khawpui hi kar khat chuangin tuiin a chim a, an khaw chanchina tuilian vanga chhiatna nasa ber an tawng a ni. Tuilian hian ziaawm lam pan ṭan mah se, khawpui chhung hmun tam tak chu tuiin a la chim a, hei vang hian tui thianghlim in tur leh nitin khawsakna atana mamawh lamahte harsatna an tawk nasa hle.

Public health engineering (PHE) minister Jayanta Malla Baruah chuan Silchar-a tuilianin thil a tihchhiat hi Rs vbc 1,000 hu aiin a tam zawk niin a sawi.