Manipur : Leimin vanga thi mi 42 an tling tawh

Manipur, Noney district-a June 29 zana leimin vanga thi chu mi 42 an tling tawh.

Pathianni khan leiminin a chhilh ruang pariat hmuh belh leh a ni. Hetih lai hian mi 20 te chu an chin hriat lohin an la awm mek a ni.

Defence Public Relations Office-in thuchhuah a siamah, leimin in a chhilh hlum mi 42 zinga mi 27 chu Territorial Army mi an ni a, mi 15-te chu civil mi an ni tih a sawi.

Leminin a chhilhte zawn hna hi chhunzawm reng ni mah se, Pathianni zan khan ruah nasa taka surin lei a min thar leh bawk a, hei vang hian hna an thawk chak thei lo tih official-te chuan an sawi.

Leiminna hmun aṭanga chhanchhuah, Territorial Army mi pasarih hliam tuarte chu Imphal-a Assam Rifles multi-speciality hospital-ah enkawl mek an ni. Pathianni khan chief minister N Biren Singh chuan hospital hi tlawhin, hliam tuarte hi Rs 50,000 ṭheuh a pe. Health minister Dr Sapam Ranjan, chief secretary Rajesh Kumar, DGP P Doungel leh official dangten Chief Minister hi an ṭawiawm a ni.