Meghalaya-in health centre 75 sa dawn

Meghalaya sorkar chuan state chhung hmun kilkhawr leh tlawhpawh harsa zawkah health centre 75 sak thar a tum.

State sorkar building sak hna hi Sauramandala Foundation a thawh tir dawn a, Selco Foundation chu technical partner a ni ang. Heng centre-te hi khaw vawt leh thlipui pawh dawl thei tur, lirnghing leh leimin lakah pawh him thei tura duan a ni dawn tih Sauramandala Foundation chuan a sawi.

Heng centre sak thar turte hi energy hmang tlem thei tur leh, a tam thei anga solar power hmang thei tura siam an ni dawn a ni. Meghalaya sorkar, Sauramandala Foundation (on-ground partner) leh SELCO Foundation (technical knowledge partner) thawkho chuan heng facility-te hi entawn tlaka siam an tum tih an sawi a ni. Centre pakhat sakna atan hian Rs nuai 50 zel ruahman a ni.

Sauramandala Foundation leh Selco Foundation thawkdun hian state chhunga hmun kilkhawr zawka health centre 100-ah solar power hi an lo vuah tawh bawk a, hemi atana a senso 70% chu state sorkarin a tum a ni.