FM-in Nagaland-a a zin hun sawn

Union finance minister Nirmala Sitharaman chuan nimina Nagaland tlawh a tum chu a sawn a, hei vang hian Nagaland sorkar chuan “Corporate Social Responsibility, Investment and Banking Conclave” a buatsaih tur pawh a ṭhulh ve nghal.

He conclave hi nimin leh vawiina neih tura ruahman a ni a , Finance Minister hian telpui a tum a ni. CRS Conclave hi Nagaland-a buatsaih a nih ṭum khatna tur a ni a, Investment and Development Authority Nagaland (IDAN)-in a huaihawt a ni. Finance Minister hi ram chhung hmun hrang hranga banker leh investor larten zui an tum a ni.

Nagaland minister Neiba Kronu chuan Finance Minister hian a zin hun tur a tihchian hnuah conclave neih hun hi puan a ni ve leh dawn tih a sawi.

IDAN CEO Alemtemshi Jami chuan he conclave hi Nagaland-a CSR investment a ṭul zia pholanna atan buatsaih tum an ni tih sawiin, NGO leh grassroot entreprenuer-te pawh an tel dawn a, investor a tam thei ang hipluh an tum dawn tih a sawi. Investor Meet hi khawpui lianah leh ram pawnahte buatsaih a ni ṭhin a, hei hi Nagaland chuan a chhawr ve thei lo a, hei vang hian he conclave hi buatsaih a tum ta tih a sawi bawk.