Manipur-a inlambunna thlengah civil mi pahnih thi

Manipur-ah kar kalta Inrinni zing khan Border Security Force (BSF)-te chu helten an lambun a, inkahna thlengah civil mi pahnih an thi.

Inlambunna hi Churachandpur district-a thleng a ni a, helte chuan security force-te chu international border bulah an lo lambun a ni. Security force-te hian camp-a mi tur water tanker chu an veng a, kawng lakah lambun an ni ta a ni. Lambunna thlen hnu hian security force-te leh helte hi hun eng emaw chen an inkap zui a, civil mi pahnihin nunna an chan phah a ni. Helte hian Behang khuaa civil mi pali an hreng bawk a ni. Imphal east district-a BSF camp bulah pawh bomb tihpuah a ni a, Inrinni zing dar 7 vel khan bomb hi tihpuah a ni. Bomb tipuaktute hi man hman an ni lo a, state leh central paramillitary force-te chuan an thawk nghal a ni.

Manipur mai bakah hmarchhak state dangah pawh tunhnaiah hel chetna a hluar hle a, kar kalta Ninganim khan Meghalaya-a South Garo Hills-ah Garo National Liberation Army (GNLA)-te chuan truck an lambun. He thil hi South Garo Hills-a Dambuk khuaa thleng a ni a, lungalhthei phur truck-te National Highway 62-ah hel mi leh sa paruk/pasarih velin silaiin an lo kap a ni. Inlambunna hi zan dar 9 vela thleng a ni a, thi leh hliam an awm hriat a ni lo.